ნინო ბაკურაძე არა მხოლოდ ილუსტრატორია, არამედ პროფესიით ექიმიცაა, რომელიც უკვე 28 წელია საქმიანობს ამ სფეროში. ის თბილისში ცხოვრობს მეუღლესთან, ორ შვილთან და მათი განსაკუთრებულ ჟღალ ვიჟლა, ბუბასთან ერთად, რომელსაც მეტსახელად „გრაფი ლასლოსაც“ ეძახიან.
პროფესიული საქმიანობის პარალელურად, ნინოს მრავალწლიანი შემოქმედებითი გამოცდილებაც აქვს: ქმნის ილუსტრაციებსა და ნახატებს, წერს. მან უკვე გამოაქვეყნა ორი წიგნი, ხოლო გამოფენა, რომელიც მალე დაეს სივრცეში გაიმართება, მისთვის მესამეა.
სიზმრები და ინსპირაცია
ნინოს ნამუშევრები სიზმრისმაგვარ სამყაროში გვატარებენ, სადაც რეალობა და ფანტაზია ერთმანეთს ერწყმის.
"სიზმარი ხომ ირეალური სამყაროა, სადაც ზღვარი არ არსებობს. მხოლოდ სურვილი სადღაც იმოგზაურო და ეს "სადღაც" შენი ფანტაზიაა. ხანდახან ფერებით, ხანდახან ჩრდილებით, შენ კი როგორც ამ სიზმრების მთავარი პერსონაჟი დაფრინავ ერთი რეალობიდან მეორეში, ბარიერების გარეშე და შენივე მოგონებულ პერსონაჟებს ხვდები, რომლებსაც არც იცნობ, იგონებ. გრჩება ფერები და ემოცია – შესაბამისად ეს ყველაფერი იღებს ფორმას."
კულტურათა ბალანსი
ნინოს ხელოვნება აერთიანებს იაპონურ ესთეტიკას, ფრანგულ ელეგანტურობას და თბილისურ სითბოს.
"ეს ის ყველაფერია, სადაც თავს შინ ვგრძნობ, ალბათ ამიტომაც. შეიძლება ფრანგული მელოდიის ფონზე, მოსიარულე გეიშას წავაწყდეთ შავთელის ქუჩაზე, სადაც მსოფლიოში ყველაზე პატარა საათია და ზუსტად შვიდ საათზე ცხოვრების ეპიზოდები ერთმანეთს ცვლის."
მისი ილუსტრაციები სხვადასხვა კულტურას ოსტატურად აერთიანებს, ქმნის ვიზუალს, რომელიც თითქოს ნაცნობიცაა და ამავდროულად ჯადოსნური.
მუსიკის როლი არტისტის შემოქმედებაში
"ალბათ ნებისმიერი მელოდია გარკვეულ გავლენას ახდენს თითოეულ ჩვენთაგანზე, მაგრამ არსებობს კიდევ "შენი" მუსიკა, რომელსაც დინამიურ მდგომარეობაში გადაყავხარ. მოძრაობს შენი ფიქრები, სხეული და ყველა ემოცია. მელოდიის გარეშე ალბათ უინტერესო იქნებოდა ყველაფერი, რითმდაკარგული სიჩუმე..."
მუსიკა მხატვრისთვის ის აქტიური თანამგზავრია, რომელიც განსაზღვრავს მის შემოქმედებით პროცესს.
რას ველოდოთ DAE-ში, გამოფენაზე
"უბრალოდ წითელ საღამოს... გასეირნებას ბუენოს აირესის ქუჩებში, ტანგოს მელოდიის ფონზე. ქუჩიდან წამოსულ ხმაურს, სადაც ყველა საკუთარ რითმს იჭერს, შეხვედრას მეგობრებთან ერთ არაჩვეულებრივ სივრცეში..."
სამომავლო გეგმები
"კონკრეტულად ვერაფერს ვიტყვი, მაგრამ ხვალ შეიძლება უცებ ახალი იდეა გაჩნდეს. ცხოვრება სწორედ ამით არის საინტერესო – თუ იდეა არსებობს, რატომაც არა, უნდა შევასხათ ფრთები."