საუბარი ლი ვუსთან, შანხაიში დაბადებულ ილუსტრატორთან, რომლის ნამუშევრებიც ფერებისა და ნაზი ემოციების ნაზავია. ედინბურგის ხელოვნების კოლეჯის მაგისტრის ხარისხითა და Burberry-სთან, Chanel-თან და სხვა ბრენდებთან თანამშრომლობით, ლის ხელოვნება ქალურობას, ბუნებასა და მშვიდ თვითანალიზს აერთიანებს.
 


შეგიძლიათ გაგვიზიაროთ თქვენი შემოქმედებითი დასაწყისი - როგორ შექმენით პირველი ილუსტრაცია და შემდეგ ამ გზის განვითარება?

ბავშვობიდანვე ძალიან მაინტერესებდა ვიზუალური ხელოვნება და მოდა. მიყვარდა ანიმაციების ყურება, განსაკუთრებით კი შანხაის სტუდიის მიერ გადაღებული კლასიკური ფილმების. სწორედ მაშინ მივხვდი, რომ ხაზების, ფერებისა და კომპოზიციების მიმართ ძლიერი მგრძნობელობა მქონდა.

ასევე მსიამოვნებს ტრადიციული მხატვრობისა და ილუსტრაციებისს შესწავლა, მოდა - განსაკუთრებით 90-იანი წლების ვინტაჟური სტილი. სწორედ ამ ყველაფერმა შთამაგონა საბოლოოდ საკუთარი ნამუშევრების შექმნის დაწყება.

თქვენს ნამუშევრებს მშვიდი, ემოციური სიღრმე აქვს. როგორ აღწერდით მის არსს?

ვფიქრობ, ჩემი მხატვრული ხმის არსი ქალურობის, ბუნებისა და თვითანალიზის ჰარმონიაა. ჩემი მიზანია შევქმნა ნახატები, სადაც ემოციები ნაზია, ხმამაღალი ტონის გარეშე - უფრო დახვეწილი ჩურჩულივი, რომელიც მნახველს შეჩერებს და ამას განაცდევინებს. ჩემი ილუსტრაციები პირად მეხსიერებასა და ჩემს გარშემო არსებული სამყაროს დაკვირვებაზეა დაფუძნებული, თუმცა, ის ასევე მარადიულ პოეზიაა. ეს არის სირბილე,, შინაგან სიღრმე, ტრადიციებისა და თანამედროვეობის ნაზი ბალანსი.

ქალები და ბუნება ხშირად ჩნდება თქვენს ილუსტრაციებში - რა ისტორიები ან შეგრძნებები შთაგაგონებთ ამ მიმართულებით?

როგორც ქალი, მე ვგრძნობ თანდაყოლილ კავშირს და სიახლოვეს მათ მიმართ. შევამჩნიე, რომ არსებობს საოცარი მსგავსება ქალების მიმზიდველობასა და ბუნების სილამაზეს შორის: ქალური სილამაზე, ისევე როგორც ბუნებრივი სამყარო, მდიდარი და მრავალშრიანია, ჰარმონიული თანაარსებობის უნარით, ხოლო თითოეული მათგანი თავისებურად ბრწყინავს. ქალებს აქვთ სინაზის და ძალის ნაზავი. ისინი ასხივებენ პოეტურ სილამაზესა და სიღრმეს, სცდებიან დროსა და სივრცეს, ისევე როგორც თავად ბუნება. ეს სილამაზე არა მხოლოდ მათ გარეგნობაში აისახება, არამედ მათ შინაგან ძალასა და სიბრძნეშიც.

როგორ ხდება იდეის განხორციელება თქვენს სახელოსნოში? შეგიძლიათ, გაგვაცნოთ თქვენი შემოქმედებითი რიტუალი - პირველი შთაგონებიდან საბოლოო ნამუშევარამდე?

როგორც ადრე აღვნიშნე, ჩემთვის შემოქმედებითი პროცესი კოლაჟის აწყობას ჰგავს. შთაგონება ყოველდღიური ცხოვრების მრავალი მომენტიდან მოდის - მე ბუნებაში ვხატავ, ვაკვირდები ცის ფერს, ბოტანიკურ ბაღებში ყვავილებს, ჩემს სამეზობლოში ხეებს ან თუნდაც ქუჩაში პატარა მაღაზიებს. ხშირად ვიღებ ფოტოებს ან ვაკეთებ სწრაფ ჩანახატებს, რათა ეს იდეები სამომავლოდ გამოვიყენო.

ნამუშევარს  როგორც წესი, ზოგადი განწყობისა და ფერთა პალიტრის გათვალისწინებით ვიწყებ. ამის შემდეგ, ელემენტებს თავისუფლად ვაწყობ, ვცვლი და ვამუშავებ მათ პროცესში. ხშირად ჩნდება ახალი იდეები, რომლებსაც შემდეგ ნახატში ვიყენებ. სწორედ ამიტომ, უმეტეს შემთხვევაში, საბოლოო ილუსტრაცია ორიგინალი ესკიზისგან საკმაოდ განსხვავებულია.

არ მიყვარს დასაწყისიდან ბოლომდე მკაცრი გეგმის დაცვა. სამაგიეროდ, ძალიან მსიამოვნებს შექმნის აქტი, როგორც აღმოჩენის მოგზაურობა - ნაწარმოების შესწავლა და განვითარება პროცესში.

თქვენ მსოფლიოს რამდენიმე ცნობილ მოდის სახლთან გიმუშავიათ. როგორ ახერხებთ თქვენი პირადი მხატვრული ენის ერთგულების შენარჩუნებას კომერციული თანამშრომლობის დროს?

ვფიქრობ, რომ კომერციული თანამშრომლობისა და პირადი პროექტებისადმი ჩემი მიდგომა განსხვავებულია. ჩემთვის პირველი კითხვა ყოველთვის ასეთია: რატომ ამირჩია ბრენდმა მე? ჩემი ნამუშევრის რომელ ნაწილს უკავშირდება ისინი? ეს მეხმარება განვსაზღვრო, რაზე გავამახვილო ყურადღება და რა დეტალები შევინარჩუნო შემოქმედებით პროცესში.

ამავდროულად, ასევე ვითვალისწინებ ბრენდის იდენტობას და პროდუქტის მახასიათებლებს, ვცდილობ, დავიცვა ბალანსი ჩემს მხატვრულ ხმასა და მათ ტონს შორის. საბედნიეროდ უმეტესობა, რომლებთანაც მიმუშავია, ძალიან პატივს სცემდა ჩემს შემოქმედებით სივრცეს და დიდ თავისუფლებას მაძლევდა.

სწორედ ამიტომ, სხვადასხვა სახის ბრენდთან თანამშრომლობამ საშუალება მომცა აღმომეჩინა ჩემი შემოქმედების ახალი ასპექტები და გამეფართოვებინა საკუთარი საზღვრები.

რა როლს ასრულებს შანხაი თქვენს წარმოსახვაში? პოულობს თუ არა ის თავის ადგილს თქვენს შემოქმედებაში?

მიუხედავად იმისა, რომ ჩემს ნამუშევრებში განგებ არ გამისვია ხაზი ქალების იდენტობასა ან კულტურულ წარმომავლობზე, მაინც ვიყენებ დახვეწილ აღმოსავლურ ელემენტებს. ბევრმა მითხრა, რომ ამ პერსონაჟებში შანხაის კულტურის გამოძახილს ხედავენ - მიუხედავად იმისა, რომ ეს ჩემი განზრახვა არ ყოფილა. შანხაი, ქალაქი, სადაც გავიზარდე, თანამედროვეობისა და ტრადიციის უნიკალური ნაზავია და ამ ატმოსფერომ, ალბათ, ჩუმად იმოქმედა ჩემს შემოქმედებით პროცესზე.

შანხაი ცოცხალი, მრავალფეროვანი ქალაქია, რომელიც ღრმად არის ფესვგადგმული ტრადიციულ კულტურაში და ამავდროულად თანამედროვე ცხოვრების პულსს იზიარებს. ჩემს შემოქმედებაში ვცდილობ, ძველსა და ახალს შორის ბალანსი ვიპოვო და იმედი მაქვს, რომ ეს ჩემი მხატვრული ხმის განმსაზღვრელი მახასიათებელი გახდება.

არის თუ არა კონკრეტული მასალები, ხელსაწყოები ან ტექსტურები, რომლებსაც უბრუნდებით - შესაძლოა ისეთები, რომლებიც თქვენი ფიქრების გაგრძელებას ჰგავს?

ამჟამად ძირითადად ციფრულ ილუსტრაციებზე ვმუშაობ, რომელიც საშუალებას მაძლევს ექსპერიმენტები ჩავატარო ფერებსა და კომპოზიციებთან, აადვილებს პროცესს - თუნდაც ანიმაციებად გადაქცევას ან სხვადასხვა პროდუქტზე გამოყენებას. ეს მიმართულება ძალიან საინტერესოდ მიმაჩნია და იმედი მაქვს, რომ კიდევ უფრო კარგად შევისწავლი.

ამავდროულად მიყვარს ფუნჯის შტრიხების ტექსტურა, ქაღალდის ზედაპირები და სხვადასხვა ტრადიციული საღებავები. მსიამოვნებს ტრადიციული მეთოდებით ხატვაც. ვფიქრობ, ციფრული და ძველი მიდგომების შერწყმამ შეიძლება საინტერესო შედეგებამდე მიგვიყვანოს. 

თქვენი პრინტები ამჟამად DAE-ს კოლექციაშია, საქართველოში. რამ დაგაინტერესათ თანამშრომლობის დაწყებამდე? 

უპირველეს ყოვლისა, ძალიან მადლიერი ვარ დაე–სი, რომ დამიკავშირდა და თანამშრომლობისთვის. საქართველო ის ქვეყანაა, რომელიც ყოველთვის შორიდან მიყვარდა და ნამდვილად იმედი მაქვს, რომ ერთ დღეს ვესტუმრები - განსაკუთრებით ახლა, როდესაც ჩემი ნამუშევრები იქ არის. ის, რომ ჩემი ნამუშევრები მსოფლიოს სხვადასხვა წერტილებშია, ძალიან მახარებს.

ასევე საინტერესოდ მიმაჩნია იმის დანახვა, თუ როგორ გააცოცხლა DAE-მ ჩემი ილუსტრაციები სხვადასხვა ფორმატში - იქნება ეს ვინტაჟური ავეჯი, პოსტერები თუ შარფები. ეს ძალიან სახალისო და მნიშვნელოვანი გზაა ჩემი ნამუშევრების მასშტაბის გასაზრდელად. შესაძლოა, საბოლოო ჯამში, ხელოვნების არსი სწორედ ამაშია?

DAE-სთვის შექმნილ ნამუშევრებს შორის არის რომელიმე განსაკუთრებულად მნიშვნელოვანი ან ისეთი, რომლის ისტორიის გაზიარებაც გსურთ?

DAE-სთან ამ თანამშრომლობის ფარგლებში შექმნილ ნამუშევრებს შორის განსაკუთრებით მომწონს „კალია“, „ყვავილების დღესასწაული“ და „აივანი“. ეს პრინტები ჩემი შემოქმედებითი გზის სხვადასხვა ეტაპს ასახავს - თქვენ ნამდვილად ნახავთ, თუ როგორ განვითარდა ჩემი სტილი დროთა განმავლობაში.

„აივანი“ იყო პირველი ნამუშევარი, სადაც დავიწყე ვინტაჟური, მოდაზე ორიენტირებული ქალის თემის შესწავლა. იმ დროს ჯერ კიდევ ექსპერიმენტულ ფაზაში ვიყავი. შემდეგ გამოჩნდა „ყვავილების დღესასწაული“, რომელმაც ჩემი შემოქმედების უფრო მომწიფებული ეტაპის ნაყოფია. ის ჩემი ერთ-ერთი ყველაზე გამორჩეული და აღიარებული ნამუშევარია. მასში ქალი წითელ, ვინტაჟურ მოსასხამს ატარებს, თავდაჯერებულობასა და ძალას ასხივებს - ილუსტრაცია, რომელსაც პირადად მე ვაღმერთებ.

„კალია“ ჩემი ერთ-ერთი ახალი ილუსტრაციაა და ის უფრო მეტ ყურადღებას ამახვილებს ქალებისა და ბუნების კავშირზე. ამ წარმოსახვით სამყაროში, მწერები გადიდებულია, ხოლო გოგონები მინიატურულები, რომლებიც თამაშობენ ფოთლებს შორის. ვფიქრობ, ეს სურათი შესანიშნავად გამოიხატება შარფის დიზაინში, რომელიც დაეშია წარმოდგენილი. 

დღევანდელ, სწრაფად ცვალებად ვიზუალურ სამყაროში, თქვენი აზრით, რა ძალა აქვს ილუსტრაციას, ან რა არის მისი სათქმელი?

დღევანდელ ტემპში, სადაც მოკლე ვიდეოები და ხელოვნური ინტელექტის განვითარება ყველაფერს სწრაფად ცვლის, ადამიანების კონცენტრაცია წარმოუდგენლად ხანმოკლე გახდა. ზოგჯერ მეც მიზიდავს ყურადღების გამფანტველი ფაქტორები, მიუხედავად იმისა, რომ შეგნებულად ვცდილობდი, არ გადმომეწერა ტიკტოკი, თუმცა მაცდურია, ჰაჰა. აღმოვაჩინე, რომ ხატვა მაძლევს ქაოსში სიმშვიდის განცდას. იქნება ეს ჩემი თუ სხვა მხატვრების შემოქმედება, შემიძლია საათობით დავაკვირდე დეტალებს და ამ დროს  ჩემს გარშემო ყველაფერი ჩერდება.

ჩემი შემოქმედების საშუალებით ვუკავშირდები აუდიტორიას, ვძლევ ენობრივ და კულტურულ ბარიერებს. იმედი მაქვს, ჩემი ილუსტრაციები სხვადასხვა პროდუქტზე, სიმშვიდესა და სიხარულის მოუტანს მათ, ვინც ნახავს.

გაქვთ თუ არა რამე ოცნებები, ან სამომავლო გეგმები, რომელთა გაზიარებაც გსურთ ჩვენი მაყურებლისთვის?

გამიმართლა, რომ გამოცდილება მივიღე და მსოფლიოს წამყვან ბრენდებთან ვითანამშრომლე. თუმცა, ჯერ კიდევ ბევრი სხვა რამეა, რითიც აღფრთოვანებული ვარ - იქნება ეს სახლის დეკორი, მუსიკა თუ კინო და ვისთანაც მომავალში თანამშრომლობის იმედი მაქვს. მსურს სხვადასხვა სფეროში უფრო მრავალფეროვანი და საინტერესო პროექტების შესწავლის შესაძლებლობა მქონდეს.

რაც შეეხება პირად პროექტებს, ასევე მინდა მეტი დრო და ყურადღება დავუთმო ჩემს შემოქმედებით პრაქტიკას. უკვე მაქვს რამდენიმე იდეა და იმედი მაქვს, რომ გავაგრძელებ ექსპერიმენტებს ჩემს შემოქმედებაში.